खन्ना, लुधियाना (पंजाब) - पंजाबमधील खन्ना येथे शिवसेना नेते महंत काश्मीर गिरी यांच्या घरात हेरॉईन जप्त केल्याचा दावा करणाऱ्या पोलिसांचाच पर्दाफाश झाला आहे. साध्या वेशातील पोलीस कर्मचारी गादीखाली पाकीट ठेवतानाचे CCTV फुटेज व्हायरल झाल्याने एकच खळबळ उडाली आहे. यानंतर खन्ना पोलीस दलातील सहायक पोलीस उपनिरीक्षक सुखदेव सिंह यांना तडकाफडकी निलंबित करण्यात आले असून, महंत गिरी यांची या प्रकरणातून मुक्तता करण्यात आली आहे.
नेमकं काय घडलं?
पोलिसांनी दिलेल्या माहितीनुसार, या प्रकरणाची सुरुवात महंत गिरी यांचे ड्रायव्हर गुरजंत सिंह उर्फ जंता याला ७.५ ग्रॅम हेरॉईनसह अटक केल्यापासून झाली. त्याच्या चौकशीच्या आधारावर शनिवारी दुपारी पोलिसांचे पथक खन्ना येथील खतिकां चौकाजवळील गिरी यांच्या घरावर छापा टाकण्यासाठी गेले.
छाप्यापूर्वी CIA स्टाफमध्ये कार्यरत असलेले ASI सुखदेव सिंह साध्या कपड्यात घरात शिरले. घरातील हिडन कॅमेऱ्यात ते एकटेच खोलीत येऊन गादीखाली काहीतरी पाकीट ठेवताना कैद झाले. काही वेळाने सदर ठाण्याचे SHO विजयपाल सिंह आणि सिटी-२ चे SHO तरविंदर कुमार बेदी यांच्यासह पथक तिथे पोहोचले आणि त्याच गादीखाली ३० ग्रॅम हेरॉईन सापडल्याचा दावा करत महंत गिरी यांना अटक केली.
गिरी यांच्या कुटुंबीयांनी हा हिडन कॅमेऱ्याचा व्हिडिओ वरिष्ठ अधिकाऱ्यांना दिला आणि नंतर तो सोशल मीडियावर व्हायरल झाला.
SSP ची कारवाई - SIT ची स्थापना
प्रकरणाचे गांभीर्य लक्षात येताच खन्नाचे वरिष्ठ पोलीस अधीक्षक डॉ. दर्पण आहलुवालिया यांनी तातडीने कारवाई केली.
"ASI सुखदेव सिंह यांना निलंबित करण्यात आले आहे. संशयित महंत काश्मीर गिरी यांना या खटल्यातून मुक्त करण्यात आले आहे," असे SSP आहलुवालिया यांनी द इंडियन एक्सप्रेसला सांगितले. या प्रकरणाच्या सखोल चौकशीसाठी SP दर्जाचे अधिकारी हरपिंदर गिल यांच्या नेतृत्वाखाली विशेष तपास पथक (SIT) स्थापन करण्यात आले असून, छाप्यात सहभागी इतर अधिकाऱ्यांची भूमिकाही तपासली जात आहे.
कोण आहेत महंत काश्मीर गिरी?
महंत काश्मीर गिरी हे खन्ना वॉर्ड क्रमांक १५ चे रहिवासी असून शिवसेना (पंजाब) चे माजी राष्ट्रीय प्रचारक आहेत. त्यांच्यावर यापूर्वीही ६ गुन्हे दाखल आहेत.
या घटनेनंतर भाजप आणि शिरोमणी अकाली दलाने भगवंत मान यांच्या आप सरकारच्या 'युद्ध नशा विरुद्ध' मोहिमेवरच प्रश्नचिन्ह उपस्थित केले आहे. पोलिसांनीच ड्रग्ज प्लांट करणे हा "आप सरकारच्या पोलिसांचा घृणास्पद प्रकार" असल्याची टीका विरोधकांनी केली आहे.
- गोदावरी टाइम्स, पंजाब ब्युरो
Post a Comment
0 Comments