एका चिमुरडीच्या अश्रूंसमोर झुकलं सरकार - 700 किमी दूर असलेली आई 24 तासांत घराजवळ!

शिमला / चंबा, हिमाचल प्रदेश, दि. 7 नोव्हेंबर - एका चिमुरडीच्या अश्रूंनी अख्खं सरकार हलवलं. आईला भेटण्यासाठी आसुसलेल्या 5वीत शिकणाऱ्या वंशिकाने मुख्यमंत्र्यांना बिलगून हंबरडा फोडला आणि मुख्यमंत्र्यांनीही दिलेला शब्द अवघ्या 24 तासांत पाळून दाखवला.

नेमकं काय घडलं?

हिमाचल प्रदेशचे मुख्यमंत्री सुखविंदर सिंह सुक्खू चंबा जिल्ह्यातील देहग्रां येथे बुधवारी 'सरकार गाव के द्वार' या कार्यक्रमासाठी आले होते.

त्याचवेळी तीसा येथील शासकीय प्राथमिक शाळा सत्यासमध्ये 5वीत शिकणारी वंशिका ठाकूर मुख्यमंत्रींना भेटली. त्यांच्यासमोर जाताच ती भावूक झाली आणि त्यांना मिठी मारून रडू लागली.

तिची एकच विनवणी होती -

"माझी आई खूप दूर नोकरी करते, तिला घराजवळ आणा ना. मला आईसोबत राहायचंय."

700 किमीचं अंतर, 3 वर्षांची ताटातूट

वंशिकाची आई नरो देवी या JBT शिक्षिका आहेत. त्या शिमला जिल्ह्यातील नेरवा शिक्षण विभागांतर्गत सोवल येथील शासकीय प्राथमिक शाळेत कार्यरत होत्या. घरापासून तब्बल 700 किमी दूर!

वंशिका 4थीपर्यंत आईसोबतच राहत होती. पण 5वीत आल्यावर तिला घराजवळच्या शाळेत दाखला घ्यावा लागला. तेव्हापासून वडील गिरीश कुमार (शेतकरी) आणि भाऊ यांच्यासोबत ती गावात राहत होती. आईची आठवण येऊन ती दररोज रडायची.

वंशिकाने मुख्यमंत्र्यांना आपलं स्वप्नही सांगितलं - "मला जवाहर नवोदय विद्यालयात जायचंय आणि मोठं होऊन IPS अधिकारी व्हायचंय."

मुख्यमंत्र्यांनी शब्द पाळला

वंशिकाचे अश्रू पाहून मुख्यमंत्री सुक्खूही भावूक झाले. त्यांनी तिला धीर दिला आणि आईला घराजवळ आणण्याचं आश्वासन दिलं.

आणि दुसऱ्याच दिवशी, गुरुवारी, शालेय शिक्षण संचालनालयाने बदलीचे आदेश काढले!

शिक्षण संचालक आशीष कोहली यांनी 5% बदली धोरणांतर्गत आणि बदलीवरील बंदीमध्ये विशेष सूट देऊन नरो देवी यांची आंतरजिल्हा बदली केली.

आता नरो देवी यांची नवीन नियुक्ती : चंबा जिल्ह्यातील तीसा येथील चंडरू शासकीय प्राथमिक शाळा

विशेष म्हणजे चंडरू ही चुराह भागातील सर्वात दुर्गम शाळा आहे. तिथे गेल्या 2 वर्षांपासून कोणीही कायम शिक्षक जायला तयार नव्हता. नरो देवी यांनी स्वतःहून तिथेच बदली मागितली होती - "मला घराजवळच्या या कठीण शाळेत पाठवा, म्हणजे मी मुलांजवळही राहीन आणि तिथल्या मुलांनाही शिकवीन."

वंशिका काय म्हणाली?

बदलीचा आदेश मिळताच वंशिकाच्या चेहऱ्यावर आनंद परतला.

"मुख्यमंत्री अंकल यांनी दिलेला शब्द पाळला. आता आई माझ्याजवळ आली आहे. आता मला एकटं राहावं लागणार नाही. मी आता आईच्या आशीर्वादाने नवोदयची तयारी करेन."

एका चिमुरडीच्या एका हंबरड्याने 700 किमीचं अंतर 24 तासांत मिटवलं. ही गोष्ट सध्या संपूर्ण हिमाचलमध्ये चर्चेचा विषय झाली आहे.

गोदावरी टाईम्स - हिमाचल प्रदेश