लोणी काळभोर / थेऊर | १० ऑक्टोबर २०२६ | गोदावरी टाइम्स
सोलापूर रोडवरील ग्रामपंचायतींना गेल्या अनेक वर्षांपासून भेडसावणारी कचरा कोंडी अखेर फुटणार आहे. पुणे महानगर प्रदेश विकास प्राधिकरणाने (PMRDA) थेऊर येथे अत्याधुनिक घनकचरा प्रक्रिया प्रकल्पाला हिरवा कंदील दिला आहे.
आमदार ज्ञानेश्वर उर्फ माऊली कटके यांच्या पाठपुराव्याला यश आले आहे.
प्रकल्पाची वैशिष्ट्ये:
1. १० एकर जागा आणि १५० टन क्षमता:
थेऊर येथील PMRDA च्या गायरान जमिनीवरील १० एकर जागेवर हा प्रकल्प उभारला जाणार आहे. या प्रकल्पाची क्षमता रोज १५० TPD (टन प्रतिदिन) असेल. हा आराखडा आजचा नाही तर सन २०४३ पर्यंतची लोकसंख्या वाढ लक्षात घेऊन तयार करण्यात आला आहे.
2. १४ गावांना थेट फायदा:
या एकाच प्रकल्पामुळे पूर्व हवेलीतील १४ ग्रामपंचायतींची कचरा समस्या कायमची निकाली निघणार आहे.
- थेऊर, लोणी काळभोर, कदमवाकवस्ती, केसनंद, वाडेबोल्हाई, उरुळी कांचन, साष्टे, कोरेगाव मूळ, सोरतापवाडी, आळंदी म्हातोबाची, नायगाव प्रयागधाम, शिंदवणे, पेठ आणि कोलवडी.
3. कसा चालणार प्रकल्प?
PMRDA आयुक्त डॉ. अभिजीत चौधरी यांच्या अध्यक्षतेखाली ६ ऑक्टोबर रोजी आकुर्डी येथील मुख्यालयात बैठक झाली. यात अंतिम निर्णय झाला.
- प्रकल्पापासून २० किलोमीटर परिसरातील ग्रामपंचायती यात सहभागी होऊ शकतात.
- ग्रामपंचायतींनी स्वतः कचरा गोळा करून थेऊर येथे आणायचा आहे.
- प्रक्रिया करण्यासाठी ठरलेली 'टिपिंग फी' ग्रामपंचायतींना PMRDA ला द्यावी लागेल.
- सहभागी होण्यासाठी प्रत्येक ग्रामपंचायतीला ग्रामसभेत ठराव पास करून PMRDA कडे पाठवावा लागणार आहे.
पार्श्वभूमी:
गेल्या काही महिन्यांपासून पूर्व हवेलीत कचरा रस्त्यावर, मुळा-मुठा नदी पात्रात टाकण्याचे आणि जाळण्याचे प्रकार वाढले होते. त्यामुळे दुर्गंधी आणि आरोग्याचा प्रश्न गंभीर बनला होता. आमदार कटके यांनी PMRDA आयुक्तांना प्रत्यक्ष पाहणी घडवून आणली होती. त्यानंतर चाकण पाठोपाठ आता थेऊरचा निर्णय झाला.
"वाढते शहरीकरण लक्षात घेता वैयक्तिक ग्रामपंचायतींना कचरा व्यवस्थापन शक्य नाही. त्यामुळे हा संयुक्त मध्यवर्ती प्रकल्प गरजेचा होता.
यामुळे भविष्यातील २० वर्षांची समस्या सुटेल." - डॉ. अभिजीत चौधरी, आयुक्त, PMRDA
या निर्णयामुळे लोणी काळभोर, उरुळी कांचन, थेऊर परिसरातील नागरिकांना मोठा दिलासा मिळाला आहे.
Post a Comment
0 Comments