गोदावरी टाइम्स - अहिल्यानगर ब्रेकिंग
अहिल्यानगर | २२ ऑक्टोबर | गोदावरी टाइम्स
अहिल्यानगर जिल्हा मध्यवर्ती सहकारी बँकेची बहुचर्चित निवडणूक पूर्णपणे बिनविरोध करण्याचे पालकमंत्री राधाकृष्ण विखे पाटील आणि माजी मंत्री बाळासाहेब थोरात यांचे स्वप्न अखेर फसले आहे. ३५९ अर्जांमधून सुरू झालेल्या रस्सीखेचीनंतर अर्ज माघारीच्या शेवटच्या दिवशी रात्री उशिरापर्यंत चाललेल्या मनधरणीनंतरही फक्त ९ जागा बिनविरोध झाल्या असून, १२ जागांवर थेट निवडणूक होणार आहे.
बिनविरोध झालेले ९ दिग्गज कोण? - दुसऱ्या पिढीला संधी
दहा वर्षे संचालक राहिलेल्यांना पुन्हा संधी न देण्याच्या अटीमुळे दिग्गजांनी आपल्या वारसांना पुढे केले -
१. राहाता - डॉ. सुजय विखे पाटील (माजी खासदार)
२. पाथर्डी - आ. मोनिका राजळे
३. नेवासा - माजी मंत्री शंकरराव गडाख
४. शेवगाव - राजश्री घुले (जि.प. माजी अध्यक्षा)
५. कोपरगाव - बिपीन कोल्हे (आ. विवेक कोल्हे यांचे बंधू)
६. श्रीरामपूर - करण ससाणे (नगराध्यक्ष)
७. संगमनेर - रणजित देशमुख (बाळासाहेब थोरात यांचे जावई)
८. नगर - आ. अक्षय कर्डिले (बिनविरोध झाल्याचे वृत्त, पण शेळके यांचे आव्हान कायम असल्याने चर्चेत)
९. बिगरशेती - सचिन जगताप (आ. संग्राम जगताप यांचे बंधू)
या ९ जागांसाठी विखे-थोरात यांच्या 'सहमती एक्सप्रेस' ला यश आले.
१२ जागांवर निवडणूक का? - ३ गट आमनेसामने
विधान परिषद सभापती राम शिंदे यांनी ४ जागांवर स्वतंत्र उमेदवार जाहीर केल्याने आणि खासदार नीलेश लंके यांनी पारनेरमधून माघार घेण्यास ठाम नकार दिल्याने बिनविरोधचे गणित बिघडले.
आता लढत त्रिकोणी होणार आहे -
गट १: विखे + थोरात युती
गट २: राम शिंदे गट
गट ३: नीलेश लंके + सदाशिव लोखंडे आघाडी
हायव्होल्टेज लढती कुठे?
- पारनेर: नीलेश लंके Vs राहुल शिंदे (विखे समर्थक) - सर्वात लक्षवेधी लढत
- राहुरी: आ. प्राजक्त तनपुरे Vs सत्यजित कदम (देवळालीचे नगराध्यक्ष) - 'स्वाभिमानाची लढाई'
- श्रीगोंदा: प्रतापसिंह पाचपुते (आ. विक्रम पाचपुतेंचे बंधू) Vs दत्तात्रय पानसरे (राहुल जगताप समर्थक)
- अकोले: आ. किरण लहामटे Vs संजीवनी शिंदे (सीताराम गायकर यांची कन्या)
- अकोले, श्रीगोंदा, पारनेर, राहुरी, कर्जत, जामखेड सोसायटी गट + महिला राखीव (२), SC/ST (१), OBC (१), VJNT (१)
आज २२ ऑक्टोबर रोजी उमेदवारांना चिन्ह वाटप होणार असून, पुढील आठवड्यात मतदान होणार आहे. दुष्काळाच्या पार्श्वभूमीवर बिनविरोधचा नारा दिला असला तरी ऐनवेळी महत्त्वाकांक्षेने पुन्हा एकदा अहिल्यानगरच्या सहकारात राजकीय भूकंप घडवला आहे.
- गोदावरी टाइम्स | अहिल्यानगर ब्युरो
Post a Comment
0 Comments